कोल्हापूर (प्रतिनिधी) : विविध कलाविष्कारातून आणि आत्मसंवादातून जीवनाचा सहज सोपा मार्ग दाखवणारे आर्ट ऑफ लिव्हिंगचे प्रमुख श्री. श्री. रवीशंकर आणि अध्यात्माला विविध सेवा कार्याची आणि शेतीपासून तंत्रज्ञानापर्यंतच्या प्रयोगशील प्रबोधन उपक्रमाची जोड देत प्रयोगशीलपणे कार्यरत असलेले परमपूज्य अदृश्य काडसिद्धेश्वर स्वामी या आध्यात्मिक क्षेत्रातील दोन गुरुवर्यांच्या भेटीने अवघा सिद्धगिरी कणेरी मठ परिसर भारावून गेला.
येत्या दि. २० ते २६ फेब्रुवारी दरम्यान होत असलेल्या ‘सुमंगलम् पंचमहाभूत लोकोत्सवाच्या तयारीची पाहणी करण्यासाठी श्री श्री रविशंकर यांनी कणेरी मठास भेट दिली. त्यांनी बारकाईने पाहणी करत या उत्सावास शुभेच्छा दिल्या.
‘सुमंगलम महोत्सव भारतीय संस्कृतीचे दर्शन घडविणारा आणि पर्यावरण प्रबोधन करणारा महोत्सव आहे. समाजाच्या वेगवेगळ्या घटकांना सोबत घेऊन पूज्यश्री काडसिद्धेश्वर स्वामी जे काम करत आहेत, ते प्रेरणादायी आहे.’ अशा शब्दात त्यांनी कौतुकही केले.
पूज्यश्री काडसिद्धेश्वर स्वामी यांनी सुमंगलम महोत्सवसंबंधी माहिती देत रविशंकर यांना महोत्सव कालावधीत सर्व कार्यकर्त्यांसह विविध उपक्रमात सहभागी होण्याची विनंती केली. अवघ्या वीस दिवसांवर येऊन ठेपलेल्या या महाउत्सवाच्या पूर्वतयारीला या दोन अध्यात्मिक क्षेत्रातील दोन दिग्गज गुरुवर्यांनी स्नेह भेट दिल्याने आणि त्यांच्या हितगुजपर संवादाने सर्वच भाविक, कार्यकर्त्यांना एक नवा उत्साह नक्कीच लाभला आहे.
