शिरोळ (प्रतिनिधी) : शिरोळ तालुक्यामधील यड्राव येथे असणाऱ्या पार्वती औद्योगिक वसाहतीमधील प्रोसेसला क्लोजरची नोटीस देऊनही उद्योग सुरू ठेवल्याने महाराष्ट्र राज्य प्रदूषण नियंत्रण मंडळाच्या आदेशानुसार महावितरणने पाच प्रोसेसचा वीजपुरवठा खंडित केला. यामध्ये मनपसंद, जुबली, बाहुबली, बिर्ला, आयको टॅक्स या पाच प्रोसेसचा समावेश आहे. त्यामुळे प्रोसेसधारकांमध्ये खळबळ उडाली आहे.
पंचगंगा नदी प्रदूषणात कारणीभूत ठरल्याप्रकरणी जबाबदार उद्योजकांवर गेल्या महिनाभरापूर्वी महाराष्ट्र राज्य प्रदूषण नियंत्रण मंडळाने कारवाईचा बडगा उगारला होता. यातील काही प्रोसेसधारकांना कारणे दाखवा नोटीस तर काही प्रोसेस धारकांना क्लोजरची नोटीस बजावली होती. यड्राव मधील मनपसंद, बाहुबली, जुबिली, बिर्ला व आयको टॅक्स या प्रोसेसना क्लोजर नोटीस देण्यात आली होती.
अखेर महाराष्ट्र राज्य प्रदूषण नियंत्रण मंडळाच्या पत्रानुसार उपकार्यकारी अभियंता सुनील अकीवाटे यांच्या मार्गदर्शनाखाली सहायक अभियंता अभिजीत बिरनाळे यांच्या पथकाने पाचही प्रोसेसचा वीज पुरवठा खंडित केला त्यामुळे या पाच प्रोसेसवर अवलंबून असणाऱ्या ६०० कामगारांवर बेकारीची कुऱ्हाड कोसळली आहे.
