लाईव्ह मराठी स्पेशल – कोल्हापुरी ठसका : एक दिवसाचा राजा !

0 9

सतराव्या लोकसभेसाठी उद्या कोल्हापूर जिल्ह्यात दोन जागांसाठी निवडणूक होत आहे. लोकशाहीत निवडणूक आणि मतदान या दोन गोष्टी महत्वाच्या आहेत. एक दिवसाचा राजा म्हणजे सर्वसामान्य मतदार असतो. फक्त याच दिवशी मतदारांना महत्त्व येते, असे खेदाने म्हणण्याची वेळ आली आहे.

मतदारांनी मतदान करून आपला प्रतिनिधी निवडायचा असतो. मतदान हा त्याचा मूलभूत हक्क आहे. अठरा वर्षावरील स्त्री-पुरुषांना मतदानाचा हक्क आहे. मतदान हा पवित्र शब्द आहे. इथे उमेदवार हा याचक असतो. तर मतदार हा दाता असतो. मात्र लोकशाहीचा ढाचाच असा बनलाय की, एकदा त्याने मतदान केले की तो या प्रक्रियेतून बाजूला जातो.

निवडणूक लागली की उमेदवारांना मतदार आठवायला लागतो. प्रचाराच्या निमित्ताने त्याला मतदारांसमोर जावे लागते. प्रचारावेळी वाकून नमस्कार करणार, गळाभेट घेणार, भावनिक साद घालणार, एखादा गरीबाला कधी मदत केली असेल तर त्याला गुलामाची वागणूक देणार. या काळात उमेदवार आणि त्यांच्या समर्थकांचे वागणे, बोलणे, चालणे संयमाचे आणि गोड असते. काहीही करुन मतदाराला भुरळ घालणे हाच त्यामागे हेतू असतो.

अगदी कशाचाच परिणाम झाला नाही तर साम, दाम, दंड, भेद या नीतीचा अवलंब केला जातो. आमिषे दाखवली जातात. मतदार त्याला भुलला की दाता याचक होतो आणि याचक दाता होतो. आजकाल मतदाताच याचक झाल्याचे पहायला मिळते.

भारतातील सर्वच राजकीय नेते हे गोडबोले, घराणेशाहीचे समर्थन करणारे आणि रक्तपिपासू असल्याची टीका यापूर्वी अनेक परदेशी नेत्यांनी केली आहे. एकदा आपले काम साधले की मतदाराला ते विचारत नाहीत. मतदार एक दिवसाचा तर विजयी उमेदवार पाच वर्षासाठी राजा होत असतो.

लोकशाहीला अपेक्षित असलेल्या कोणत्याही तत्त्वाशी त्यांचा संबंध राहात नाही. लोकशाहीची उघड-उघड थट्टा मांडल्याचे यापूर्वी अनेकवेळा पहायला मिळाले आहे. मतदारांनी उघड्या डोळ्यांनी, अभ्यासू वृत्तीने उमेदवारांच्या कोणत्याही आमिषाला, दडपशाहीला बळी न पडता नि: पक्षपणे लोकशाहीच्या आणि सार्वत्रिक हितासाठी मतदान करण्याची गरज आहे. मतदारांनी केवळ एक दिवसाचा राजा न होता पाच वर्षाचा राजा व्हायला हवं. ते ज्या दिवशी होईल तोच लोकशाहीचा सुवर्ण दिन असेल.

-ठसकेबाज

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish.AcceptRead More