हिंदुत्ववादी संघटना गेल्या अनेक दिवसांपासून लव जिहाद, धर्मांतर, आंतरजातीय विवाहांविरोधात आक्रमक झाल्या आहेत. या पार्श्वभूमीवर आजऱ्यात एक धक्कादायक प्रकार घडला असून शाळेचं गॅदरिंग आटोपून परतणाऱ्या मुलीची छेड काढल्याचा प्रकार समोर आला आहे. त्यामुळे हिंदू जन आक्रोश मोर्चाच्यावतीने तीन दिवस आजरा बंदची हाक देण्यात आली आहे.
मिळालेल्या माहितीनुसार हिंदू जन आक्रोश मोर्चाच्यावतीने आजऱ्यामध्ये बुधवार, गुरुवार आणि शुक्रवार असा तीन दिवस बंद पुकारण्यात आला आहे. तर शुक्रवार दिनांक 6 जानेवारी रोजी हिंदू जन आक्रोश मोर्चा काढण्यात येणार आहे. हा मोर्चा व्यंकटराव हायस्कुल आजरा ते शिवतीर्थ आजरा या मार्गावर असणार आहे.
घडलेला प्रकार असा की, आजऱ्यातील एका शाळेचं गॅदरिंग आटोपून आपल्या घराकडे परत येत असलेल्या मुलीची छेड काढण्यात आल्याचा प्रकार रात्रीच्यावेळी घडला. या प्रकाराने स्थानिक नागरिक आक्रमक झाले असून, आजऱ्यात तणावाचं वातावरण आहे. याचा निषेध म्हणून तीन दिवस आजरा बंदची हाक देण्यात आली आहे. हिंदू जन आक्रोश मोर्चाच्यावतीने हा बंद पुकारण्यात आला आहे. दरम्यान या प्रकारामुळे नागरिकांनी अशा घटनांना आळा बसावा तसेच आरोपींवर कडक कारवाई व्हावी अशी मागणी केली आहे. मात्र या बंदाचा मोठा फटका व्यापाऱ्यांना बसण्याची दाट शक्यता आहे.
