नागपूर (वृत्तसंस्था) : राष्ट्रावादीचे प्रदेशाध्यक्ष आणि विधानसभा गटनेते जयंत पाटील यांचं हिवाळी अधिवेशन संपेपर्यंत निलंबन करण्यात आले आहे. विधानसभा अध्यक्ष राहुल नार्वेकर यांनी पाटील यांच्या निलंबनाचा ठराव मांडला आणि आवाजी मतदानाने तो मंजूर करण्यात आला. जयंत पाटील यांनी वापरलेल्या शब्दांमधून सभागृहाचा आणि अध्यक्षांचा अवमान झाला असल्याचे निरीक्षण अध्यक्ष नार्वेकर यांनी नोंदवले.
विधानसभा अध्यक्ष राहुल नार्वेकर यांच्याविषयी अपशब्द वापरल्याचा दावा करत सत्ताधारी पक्षांनी आणि स्वतः मुख्यमंत्री एकनाथ शिंदे यांनी जयंत पाटील यांचे तत्काळ निलंबन करण्याची मागणी केली होती. त्यानंतर नार्वेकर यांच्या दालनात मुख्यमंत्री शिंदे यांच्या उपस्थितीमध्ये पार पडलेल्या बैठकीनंतर याबाबतचा निर्णय घेण्यात आला.
