कोल्हापूर : गांधी मैदानाच्या सर्वांगीण विकासासाठी १९ कोटी रुपयांच्या निधीची मागणी आमदार जयश्री जाधव यांनी नागपूर येथे सुरू झालेल्या हिवाळी अधिवेशनाच्या पहिल्या दिवशी मुख्यमंत्री शिंदे यांची भेट घेतली आणि गांधी मैदानाच्या सर्वांगीण विकासासाठी निधी मागणीचे निवेदन दिले. यावेळी मुख्यमंत्री शिंदे यांनी कोल्हापूरातील गांधी मैदानाच्या सर्वांगीण विकासासाठी निधी देण्याचे आश्वासन दिले.
निवेदनातील म्हटले आहे की, राज्यात खेळाडू व क्रिडा संस्कृतिला चालना देणारे शहर म्हणून कोल्हापूरची ओळख आहे. देशाच्या विविध भागातील खेळाडू कोल्हापूरमध्ये सरावासाठी येतात. कुस्ती, फुटबॉल, जलतरण, नेमबाजी, हॉकी, बास्केटबॉल, स्फॉटबॉल, क्रिकेट, कबड्डी, खो-खो, वेटलिफ्टिंग, शरीरसौष्ठव, रबी, तलवारबाजी, मैदानी स्पर्धा अशा सर्व क्रिडा प्रकारात कोल्हापूर राज्य, देशासह जगात चमकले आहे. कोल्हापूरातील क्रिडा संस्कृतीला चालना देण्यासाठी खेळाडुंना प्रोत्साहन व सरावासाठी पाठबळ देणे गरजेचे आहे व राज्य सरकारचे कर्तव्य आहे. यासाठी मैदानाचा सर्वांगीण विकास करणे गरजेचे आहे.
गांधी मैदानावर पावसाळ्यात पावसाचे पाणी साचून राहते. परिणामी मैदानाला तळ्याचे स्वरूप येते. त्यामुळे गांधी मैदाना वरील पावसाचे पाणी व सांडपाण्याचे निर्गतीकरण करणे गरजेचे आहे. त्यामुळे गांधी मैदानाच्या सर्वांगीण विकासासाठी व मैदानात विविध सोयी-सुविधा उपलब्ध करून देण्याकरीता दिवंगत आ. चंद्रकांत जाधव यांनी आराखडा तयार करून घेतला आहे. या आराखड्यात मैदानावर येणारे सांडपाण्याचा निर्गतीकरणासह खेळासाठी विविध सोयी-सुविधाचा समावेश आहे. हा आराखडा महापालिकेकडे सादर केला असून, यासाठी सुमारे १९ कोटी रुपये निधीची आवश्यकता आहे. त्यामुळे गांधी मैदानासाठी टप्प्याटप्प्याने १९ कोटी रुपयांचा निधी मंजूर करावा, अशी मागणी आ. जाधव यांनी केली आहे.
