सांगोला / नाना हालंगडे –

नाविन्यपूर्ण राज्यस्तरीय व जिल्हास्तरीय योजनेअंतर्गत दुधाळ गाई म्हशीचे गट वाटप करणे, शेळी – मेंढी गट वाटप करणे, 1000 कुकुट पक्षांच्या संगोपनासाठी निवारा शेड उभारणीस अर्थसाह्य देणे, 100 कुक्कुट पिलांचे वाटप व 25 + 3 तलंगा गट वाटप या योजनेसाठी ऑनलाईन पद्धतीने लाभार्थी निवड प्रक्रिया सन 2022 – 23 या वर्षात राबवली जाणार आहे.

सदर योजनेचा लाभ घेण्यासाठी व पशुसंवर्धन विभाग अंतर्गत राबवल्या जाणाऱ्या वैयक्तिक लाभाच्या योजनेसाठी लाभार्थ्यांनी ऑनलाईन अर्ज सादर करावेत असे आवाहन तालुका पशुसंवर्धन अधिकारी डॉ.सय्यद यांनी केले आहे.
राज्याच्या ग्रामीण भागातील सुशिक्षित व बेरोजगार युवकासह पशुपालक व शेतकरी बांधवांना स्वयंरोजगाराचे साधन उपलब्ध करून देत, त्यांना शाश्वत अर्थजनाचा पर्याय उपलब्ध करून देणाऱ्या पशुसंवर्धन विभागाने विविध योजना व उपक्रमाद्वारे ग्रामीण महाराष्ट्राचे अर्थचक्र गतिमान ठेवण्याचा नेहमीच प्रयत्न केला आहे.
विविध योजना व उपक्रमांच्या माध्यमातून ग्रामीण भागातील पशुपालक शेतकरी बांधवांना स्वयंरोजगाराचे साधन उपलब्ध करून देण्यासाठी कटिबद्ध असलेल्या महाराष्ट्र शासनाच्या पशुसंवर्धन विभागाच्या वतीने वैयक्तिक लाभाच्या योजना अंतर्गत प्रक्रिया अधिक पारदर्शक करण्यासाठी राज्यस्तरीय नाविन्यपूर्ण योजनेमध्ये गेली चार वर्ष ऑनलाईन पद्धतीने अर्ज मागविण्यात व लाभार्थी निवडणे ही पद्धत सुरू करण्यात आली आहे. याबरोबर जिल्हास्तरीय विविध योजनेसाठी संगणक प्रणाली लागू करण्यात आली आहे. यामध्ये शासनाने एखाद्या योजनेकरता अर्ज केल्यानंतर त्यास दरवर्षी पुन्हा अर्ज करावे लागू नये यासाठी तयार केलेल्या प्रतीक्षा यादी सन 2021- 22 पासून पुढील 5 वर्षापर्यंत म्हणजे सन 2025 -26 करिता लागू ठेवण्याची सोय केली आहे. यामुळे अर्ज केलेल्या पशुपालकांना लाभ मिळण्याची शक्यता वाढली असून त्याची प्रतीक्षा यादीतील क्रमांका नुसार अंदाजे केव्हा लाभ मिळेल हे कळू शकल्यामुळे लाभार्थी हिस्सा भरणे किंवा इतर बाबीं करता नियोजन करता येणे शक्य होणार आहे.
नाविन्यपूर्ण राज्यस्तरीय व जिल्हास्तरीय योजनेअंतर्गत दुधाळ गाई म्हशीचे गट वाटप करणे, शेळी – मेंढी गट वाटप करणे, 1000 कुकुट पक्षांच्या संगोपनासाठी निवारा शेड उभारणीस अर्थसाह्य देणे, 100 कुक्कुट पिलांचे वाटप व 25 + 3 तलंगा गट वाटप या योजनेसाठी ऑनलाईन पद्धतीने लाभार्थी निवड प्रक्रिया सन 2022 – 23 या वर्षात राबवली जाणार आहे. पशुपालकांनी डेअरी, पोल्ट्री किंवा शेळीपालन यापैकी ज्याबाबी मध्ये अर्ज करायचा आहे त्याची निवड करायची सुविधा देखील उपलब्ध करून देण्यात आले आहे. राज्यातील पशुपालक – शेतकरी बांधव, सुशिक्षित बेरोजगार युवक – युवती व महिलांनी या योजनेचा लाभ घेण्यासाठी ऑनलाईन पद्धतीने अर्ज करण्याची आवाहन पशुसंवर्धन विभागाअंतर्गत करण्यात आले आहे.
ऑनलाइन अर्ज सादर करण्यासाठी http.//ah.mahabms.com या संकेतस्थळावर अर्ज सादर करता येणार आहेत. सदर अर्ज सादर करण्यासाठी 11 जानेवारी 2023 पर्यंत मुदत असणार आहे. याच बरोबर योजनांची संपूर्ण माहिती तसेच अर्ज करण्याची पद्धती याबाबतचा संपूर्ण तपशील संकेतस्थळावर तसेच मोबाईल ॲप वर उपलब्ध आहे. अर्ज फक्त ऑनलाईन पद्धतीने स्वीकारले जातील, या संगणक प्रणालीमध्ये अर्ज भरणे अत्यंत सुलभ करण्यात आले असून अर्जामधील माहिती कमीत कमी टाईप करावी लागेल. आणि बहुतांशी माहिती बाबत पर्याय निवडण्याच्या सुविधा उपलब्ध करून देण्यात आल्या आहेत. त्यामुळे पशुपालकांनी अर्ज भरण्याकरिता स्वतःचे मोबाईलचा जास्तीत जास्त वापर करावा. अर्ज भरताना अर्जदारांनी नोंदवलेल्या मोबाईल क्रमांकावर अर्जाच्या स्थितीबाबत संदेश पाठवण्यात येणार असल्याने कोणत्याही परिस्थितीत अर्जदाराने योजनेअंतर्गत आपला मोबाईल क्रमांक बदलू नये व मागील वर्षी अर्ज केलेल्या अर्जदारांनी पुन्हा अर्ज करायची आवश्यकता लागणार नाही.
योजनेबाबत अधिक माहितीसाठी टोल फ्री क्रमांक 1962 किंवा 1800-233-0418 या क्रमांकावर अथवा तालुका पशुसंवर्धन अधिकारी तसेच पंचायत समिती, जिल्हा पशुसंवर्धन अधिकारी अथवा उपायुक्त कार्यालय तसेच नजीकच्या पशुवैद्यकीय केंद्रावर संपर्क साधावा असे आवाहन तालुका पशुवैद्यकीय अधिकारी डॉक्टर असलम सय्यद यांनी सांगितले आहे