स्वयंघोषित इतिहाससंशोधक इंद्रजीत सावंत यांच्या हाती सुडाची मशाल : शहर भाजपची टीका

0 2

कोल्हापूर (प्रतिनिधी) : शाहू स्मारक येथील एका कार्यक्रमात इतिहाससंशोधक इंद्रजीत सावंत यांनी मुख्यमंत्री फडणवीस आणि खा. संभाजीराजे यांच्यावर बालबुद्धीयुक्त टीका केली. प्रसिद्धीच्या हव्यासापोटी चुकीच्या शब्दांत त्यांनी छ. शिवाजी महाराजांच्या राजधानीच्या संवर्धन कार्यक्रमाविषयी आक्षेप नोंदवला आहे. मुख्यमंत्री व खा. छ. संभाजीराजे यांचे काम, व्यक्तिमत्त्व व प्रामाणिकपणा यांच्या जवळपासही आपण नसल्याचे भान सावंत यांनी ठेवावे, अशा शब्दात शहर भाजपतर्फे सावंत यांच्यावर टीका करण्यात आली आहे.

इंद्रजीत सावंत यांनी शाहू स्मारक भवनात झालेल्या व्याख्यानमालेत रायगडाची बांधणी व उभारणी, संवर्धनासाठी सुरू असलेल्या कामावरून फडणवीस यांच्यावर टीका केली. तसेच संवर्धन कार्यक्रमाला आग ही उपमा देऊन त्यामध्ये कोल्हापूरचे छत्रपती संभाजीराजे यांची आहुती जाईल, असे वक्तव्य केले होते. शहर भाजपने आज (मंगळवार) पत्रक काढून सावंत यांच्या वक्तव्याचा निषेध केला. पत्रकात म्हटले आहे की, मुख्यमंत्री देवेंद्र फडणवीस व खा. छत्रपती संभाजीराजे यांनी प्रामाणिकपणे गडकोट किल्ले संवर्धन-प्राधिकरण हा कार्यक्रम हाती घेतला आहे. फडणवीस यांनी रायगडावर जाऊन पाहणी केली व अभियंता आणि तांत्रिक अधिकारी वर्ग यांच्याबरोबर बैठक घेतली. याठिकाणी उत्खनन व संवर्धन करताना शिवकालीन सुमारे ३०० वाडे व इतर वास्तू यांच्या संदर्भात पुरावे व अस्तित्व दिसून आलेले आहे. रायगडासाठी ६०० कोटींचा निधी अर्थसंकल्पामध्ये विशेष राखीव निधी म्हणून घोषीत केलेला आहे व तो निधी संवर्धनाच्या कामासाठी वापरला देखील जात आहे. असे असताना सावंत यांनी काल एका कार्यक्रमात ‘मराठ्यांच्या इतिहासाचा वापर करून सत्तेत आलेले मुख्यमंत्री’ असा उल्लेख करून संपूर्ण समाजाची नाहक बदनामी केलेली आहे.

सावंत हे अर्ध्या हळकुंडाने पिवळे झालेले स्वयंघोषीत इतिहास संशोधक आहेत. इकडून तिकडून माहिती गोळा करायची, पुस्तक छापून प्रतिष्ठीत व्यक्ती व लोकप्रतिनिधींना बोलवून त्याचे प्रकाशन करायचे व व्यवसायिक लाभ घ्यायचा असे त्यांचे तंत्र आहे.  संभाजीराजे यांनी इंद्रजीत सावंत यांना ओळख निर्माण करून दिली आणि आज त्याच संभाजीराजे यांच्याविषयी ते अवमानजनक वक्तव्य करत सुटलेले आहेत. समाजामध्ये व जातीमध्ये तेढ निर्माण करण्याचे पाप त्यांनी केलेले आहे. कॉंग्रेस राजवटीमध्ये ते गडकोट संवर्धनाविषयी का बोलत नव्हते ? संवर्धन कार्यक्रमाला महायज्ञ (आग) अशी उपमा देऊन या कार्यक्रमाला आग हाच शब्द त्यांना का सुचला ? आणि या आगीमध्ये कोल्हापूरचे छत्रपती यांची आहुती (बळी) देण्याविषयी वक्तव्य करून त्यांना काय सूचित करायचे आहे ? या प्रश्नांतून हे स्पष्ट होते.  

सदर पत्रकाद्वारे व तमाम शिवप्रेमी जनतेच्या वतीने जाहीर इशारा देण्यात येत आहे, वैयक्तिक आकस व पदाच्या ह्व्यासापोटी छ. शिवाजी महाराज यांच्याविषयी अथवा रायगड विकास कार्यक्रमाविषयी इंद्रजीत सावंत व त्यांच्यासारख्या बालिश चमूने पुन्हा कोणतेही वक्तव्य करू नये, असा इशारा देण्यात आला आहे. या पत्रकावर भाजपा जिल्हाध्यक्ष संदीप देसाई,  उपाध्यक्ष राहुल चिकोडे,  माजी नगरसेवक आर. डी. पाटील, सरचिटणीस संतोष भिवटे, सुभाष रामुगडे, विजय जाधव, उपाध्यक्ष गणेश देसाई, दिलीप मेत्राणी यांच्या सह्या आहेत.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More