Breaking News

 

 

जि. प. सभेत शिक्षकांच्या बदल्यांवरून गदारोळ

कोल्हापूर (प्रतिनिधी) : सर्वसाधारण सभेची नोटीस सदस्यांना वेळेत मिळत नाही. मागील सभेत मंजूर झालेल्या कामाच्या ठरावांची चार-चार महिने पूर्तता होत नाही. शिक्षकांच्या बदल्यांमध्ये पदाधिकारी आणि अधिकाऱ्यांनी अर्थपूर्ण घडामोडीतून केल्या आहेत, असे आरोप करीत जिल्हा परिषदेच्या सर्वसाधारण सभेत सदस्यांनी प्रशासनाला चांगलेच धारेवर धरले. जवळपास दीड तास सभा बदली प्रकरणावर चांगलीच गाजली. लोकसभा निवडणुकीची आचारसंहिता संपल्यानंतर जिल्हा परिषदेची सर्वसाधारण सभा आज (मंगळवार) पार पडली.

आज दुपारी एक वाजता सभेस प्रारंभ झाला. राजवर्धन निंबाळकर, राहुल आवाडे यांनी सभेच्या नोटिसा मिळत नसल्याबद्दल तक्रारी सभागृहाच्या निदर्शनास आणून दिल्या. हे वारंवार घडतं या प्रश्नाचे उत्तर द्यावे असं म्हणत असताना इतर सदस्यांनी यावर जोरदार आवाज उठवला. जिल्हा परिषद आज सभा आहे हे आम्हाला बाहेरून कळतं, आम्ही सदस्य आहे की कोण असा प्रश्न पडला आहे, असे सांगत आवाडे यांनी चुका करणाऱ्या अधिकाऱ्यांवर कारवाई करा अशी मागणी केली. त्यानंतर राजवर्धन निंबाळकर, प्रसाद खोबरे, हेमंत कोलेकर, प्रवीण यादव आदी सदस्यांनी शिक्षकांच्या बदल्यामध्ये झालेल्या चुकीच्या गोष्टी सभागृहाच्या निदर्शनास आणून दिल्या.

ज्या शिक्षकांच्या बदल्या करायला हव्या होत्या त्या केल्या नाहीत, चुकीच्या पद्धतीने बदल्या केल्या आहेत. ज्या शिक्षकांनी फॉर्ममध्ये खरी माहिती भरली त्यांच्या विनाकारण बदल्या करण्यात आल्या आणि ज्यांनी खोटी, चुकीची माहिती भरली ते आहे तिथेच आहेत. हा दुजाभाव का आणि कशासाठी याबाबतीत अर्थपूर्ण घडामोडी घडल्या आहेत, असा आरोप निंबाळकर यांनी केला.

यावर प्रशासनाकडून सांगण्यात आले की नियमानुसार बदल्या झाल्या आहेत. यावर सदस्य प्रकाश पाटील यांनी  शिक्षकांना क्लिन चीट कशासाठी, का देता ? चुकीची माहिती व खोटी माहिती दिली आहे त्या शिक्षकांची वेतन वाढ रोखण्यात यावी, त्यांची दुर्गम भागात बदली करण्यात यावी अशी मागणी केली. यावर बहुतांश सदस्यांनी ठराव करावा असा आग्रही मागणी केली.

एकंदरीत आजची सभा शिक्षकांच्या बदलीवरून चांगलीच गाजली. यावेळी अध्यक्षा सौ. शौमिका महाडिक, उपाध्यक्ष सर्जेराव ज्ञा. पाटील, बांधकाम सभापती सर्जेराव पाटील-पेरीडकर, समाजकल्याण सभापती विशांत महापुरे, महिला व बालकल्याण सभापती वंदना मगदूम, मुख्य कार्यकारी अधिकारी अमन मित्तल, सर्व विभागप्रमुख व सदस्य उपस्थित होते

708 total views, 3 views today

Leave a Reply

Your email address will not be published. Required fields are marked *

News Flash

अर्थ - उद्योग