कोल्हापूर (प्रतिनिधी) : महिला आर्थिक विकास महामंडळामार्फत नवतेजस्विनी महाराष्ट्र ग्रामीण उद्यम विकास प्रकल्पअंतर्गत बचत गट व वैयक्तिक महिलांना धनादेशाच्या वाटपचा कार्यक्रम जिल्हा परिषदेचे मुख्य कार्यकारी अधिकारी संजयसिह चव्हाण यांच्या हस्ते करण्यात आला.
अतिगरीब महिलांना उद्योग व्यवसायची सुरुवात/वाढ करण्याकरिता वैयक्तिक कर्ज पुरवठा यामध्ये १५ हजार रुपये देण्यात येणार आहेत. ज्या स्वयं सहाय्यता महिला बचत गटांनी गेल्या ५ वर्षांत एकदाही कर्ज घेतले नाही किंवा काही अपरिहार्य कारणाने (नैसर्गिक आपत्ती /स्थलांतर) कर्ज परतफेड न केल्यामुळे पीटीआर सिद्ध झालेल्या बचत गटांना समुपदेशन करून अल्प व्याज दराने कर्ज पुरवठा वितरण करण्यात येणार आहे. माविम कोल्हापूरमध्ये सन २०२२-२३ या आर्थिक वर्षात १४ बचत गट व ११५ वैयक्तिक महिलांना कर्ज वाटप करण्यात येणार आहे.
मुख्य कार्यकारी अधिकारी संजयसिह चव्हाण यांच्या हस्ते राधाकृष्ण, भीमरत्न व स्वरांजली या बचत गटांना प्रत्येकी ५० हजार रुपये व वैयक्तिक महिला पल्लवी चौगुले, सुषमा कांबळे, महिला चंद्रभागा गवळी व जयश्री हजारे यांना प्रत्येकी १५ हजार रुपयांचा धनादेश वाटप करण्यात आला. ज्या महिलांना १५ हजार रुपये देण्यात आले आहे, त्या महिला बीसी पॉईंट सुरू करणार आहेत. उमेश लिंगनूरकर यांनी आभार मानले. सूत्रसंचालन व्यवस्थापक रवींद्र कुंभार यांनी केले. कार्यक्रमास लेखाधिकारी विनायक कुलकर्णी, विजय कलकुटकी, सीएमआरसी व्यवस्थापक, सहयोगिनी व बचत गटातील महिला उपस्थित होत्या.
