Breaking News

 

 

महापालिकेतील ‘त्या’ पद नियुक्तीला स्थगिती…

कोल्हापूर (प्रतिनिधी) : तीस हजार रुपये इतक्या ठोक मानधनावर महापालिकेत जनसंपर्क अधिकारी पद भरण्यास औद्योगिक न्यायालयाच्या न्यायाधिश समीना खान यांनी आज (शुक्रवार) स्थगिती दिली. या संबंधी महापालिका कर्मचारी संघटनेने न्यायालयात धाव घेतली होती. संघटनेतर्फे अॅड. उदय जाधव यांनी काम पाहिले.

महापालिकेचे जनसंपर्क अधिकारी पद रिक्त आहे. मात्र या पदावर प्रभारी म्हणून मोहन सूर्यवंशी हे काम पहात आहेत. मात्र, महापालिकेने हे पद भरण्यासाठी जाहिरात दिली होती. उद्या त्यासाठी मुलाखतीही होणार होत्या. मात्र महापालिकेकडे उपलब्ध असणाऱ्या कर्मचाऱ्यांपैकी पात्र कर्मचाऱ्यांमधूनच हे पद भरावे, असा ठराव १९८१ मध्ये महासभेत झाला होता. शिवाय निवृत्त कर्मचाऱ्याला पुन्हा नियुक्त करता येता नाही. तथापी महापालिकेने निवृत्त व अनुभवी व्यक्तीची नियुक्ती करण्याचा घाट घातला होता. त्याला संघटनेने विरोध दर्शवला होता. याबाबतचे निवेदन आयुक्त डॉ. एम.एस.कलशेट्टी यांना दिले होते.

मात्र, आयुक्तांनी संघटनेच्या पदाधिकाऱ्यांशी चर्चा केली नाही. त्यामुळे संघटनेने या भरतीसंबंधी काल (गुरुवार) औद्योगिक न्यायालयात याचिका दाखल केली होती. परंतु पद नियुक्तीसाठी कोणतीही कायदेशीर अडचण येऊ नये, यासाठी महापालिकेतर्फे कॅव्हेट दाखल केले होते. त्यामुळे काल सुनावणी झाली नाही. आज या प्रकरणी सुनावणी झाली. यावेळी अॅड. उदय जाधव यांनी हे पद महापालिकेच्या नियमावलीनुसार भरले जात नाही, महापालिकेच्या कर्मचाऱ्यालाच प्राधान्य देणे आवश्यक आहे. यापूर्वीही हे पद याच पद्धतीने भरले आहे, शिवाय या पदावर सध्या प्रभारी म्हणून अधिकारी नियुक्त केला आहे. त्याला या पदासाठी महिन्याला केवळ पाचशे रुपये भत्ता दिला जात आहे. निवृत्त कर्मचाऱ्याला पुन्हा सेवेत घेता येत नाही. परंतु महापालिकेने तसा निर्णय घेतला आहे. त्यामुळे महापालिकेचे आर्थिक नुकसान होणार असल्याने या भरतीला स्थगिती द्यावी, अशी विनंती अॅड. जाधव यांनी न्यायालयात केली.

ती ग्राह्य मानून या भरतीला औद्योगिक न्यायालयाकडून स्थगिती देण्यात आली आहे. याप्रकरणाची पुढील सुनावणी ११ जून रोजी होणार असल्याचे अॅड. जाधव यांनी सांगितले.

558 total views, 3 views today

Leave a Reply

Your email address will not be published. Required fields are marked *

News Flash