गगनबावडा (प्रतिनिधी) : गगनबावडा तालुक्यातील चौधरवाडी येथील शेतकरी शिवाजी श्रीपती शेलार (वय ४०) हे गव्याने केलेल्या हल्ल्यात जखमी झाले. वनविभागाने तात्काळ घटनास्थळी धाव घेऊन त्यांना उपचारासाठी तातडीने कोल्हापूर येथील खासगी रुग्णालयात दाखल केले आहे.
आज (शुक्रवार) संध्याकाळच्या सुमारास शिवाजी शेलार हे सुतारांचा मळा इथे ऊसतोड करीत होते. यावेळी ऊसामध्ये असलेल्या गव्याच्या हालचालीचा अंदाज आला नाही. तर गव्याने शिवाजी शेलार यांना पाठीमागून जोराची धडक मारली. त्यामुळे शेलार बांधाच्या खाली पडले. त्यांनी लगेचच प्रसंगावधान दाखवत स्वतःला सावरले आणि गव्याच्या धडकेतून सुटका करून घेतली.
शेतकरी सकाळी वैरण आणण्यासाठी गेले असता उसात बसलेले गवे हल्ला करतात असे अनेक प्रकार धामणी खोरीत या अगोदर देखील घडले आहेत. त्यामुळे शेतकरी वर्गात भीतीचे वातावरण निर्माण झाले आहे. त्यामुळे गव्यांचा बंदोबस्त करण्याची मागणी नागरिकांतून होत आहे.
