कोल्हापूर (प्रतिनिधी) : दत्त जयंती उत्सवानिमित्त प्रयाग चिखली पंचगंगा नदी संगम, दत्त मंदिर येथे रविवारी (दि. २७) पहाटे पूजा-अर्चा, संकल्प करून पदयात्रेला प्रारंभ होणार आहे, अशी माहिती पदयात्रेचे अध्यक्ष अमोल कोरे, संस्थापक रमेश चावरे, कार्याध्यक्ष सुहास पाटील यांनी पत्रकार परिषदेत दिली.
जिल्ह्यातील ३०० भक्त गेली सात वर्षे अक्कलकोटला पायी चालत जात आहेत. पायी दिंडीतील सर्व भाविकांना अकरा दिवस चहा नाष्टा, महाप्रसाद, राहण्याची सोय मोफत करण्यात आली आहे. या दिंडीत सहभागी होणाऱ्या भक्तांनी आपली नावे नोंदणी प्रयाग चिखली दत्त मंदिर येथे शनिवारी सायंकाळी पाच वाजेपर्यंत नोंदवावीत, असेही आवाहन करण्यात आले आहे.
२७ नोव्हेंबर, रविवारी सकाळी पहाटे पाच वाजता दत्त मंदिर पंचगंगा नदी संगम, प्रयाग चिखली येथे सर्व स्वामी भक्तांच्यावतीने स्वामी महाराजांना अभिषेक व संकल्प होऊन पदयात्रा अक्कलकोटकडे प्रस्थान होईल. सकाळी ही पदयात्रा मिरवणुकीने शहरातील शिवाजी चौकात पोहचेल. येथे शिवाजी चौक तरुण मंडळाच्या वतीने महाआरती होईल. तेथून मार्केट यार्ड येथील विठ्ठल रुक्मिणी मंदिरात दुपारच्या महाप्रसादासाठी थांबेल. रात्री अतिग्रे येथे पदयात्रा मुक्कामी जाईल.
दि. २८ नोव्हेंबरला जयसिंगपूर येथील श्री स्वामी समर्थ मंदिरात मुक्काम, २९ नोव्हेंबर- कळंबी प्राथमिक शाळा, ३० नोव्हेंबर- कवठेमहांकाळ, १ डिसेंबर- जुनोनी. २ डिसेंबर- वाढेगाव, ता. सांगोला, ३ डिसेंबर– मंगळवेढा, ४ डिसेंबर- वाघोली सूतगिरणी, ५ डिसेंबर- गेनसिद्धनाथ मंदिर, कुंभारी. ६ डिसेंबर- स्वामी समर्थ सेवा आश्रम कोन्हाळी आणि ७ डिसेंबरला पदयात्रा अक्कलकोट येथे पोहचेल, असा या पदयात्रेचा कार्यक्रम आहे.
अक्कलकोट येथे सकाळी नऊ वाजता भव्य मिरवणुकीने समाधी मठ व वटवृक्ष स्वामी समर्थ महाराज मंदिरात पदयात्रेचा प्रवेश होईल. पत्रकार परिषदेला पदयात्रेचे सचिव जगमोहन भुर्के, यशवंत चव्हाण, राहुल जगताप उपस्थित होते.
