मोदींना क्लीन चीट देण्यास माझा विरोधच होता, पण… : निवडणूक आयुक्तांचा आरोप

0 1

नवी दिल्ली (वृत्तसंस्था) : आचारसंहिता उल्लंघन प्रकरणी पंतप्रधान नरेंद्र मोदी यांना क्लीन चीट देण्यास माझा विरोधच होता. क्लीन चिट देण्याबाबतच्या निर्णयात बहुमत महत्त्वाचे असले तरी अल्पमताचाही आदेशात उल्लेख केलाच पाहिजे,  ही व्यवस्था निर्माण होत नाही तोवर बैठकीत सहभागी होणार नाही, असा पवित्रा निवडणूक आयुक्त अशोक लवासा यांनी घेतला आहे. त्याबाबतचे पत्रच त्यांनी मुख्य निवडणूक आयुक्त सुनील अरोरा यांना पाठवले आहे. अरोरा यांनी मात्र जोवर तुम्ही आयोगात आहात तोवर तुमचे मत सार्वजनिकरित्या मांडणे अयोग्य आहे, अशा शब्दात लवासा यांना सुनावले आहे. यामुळे आयोगातील मतभेद चव्हाट्यावर आले आहेत.

अशोक लवासा यांनी पंतप्रधान नरेंद्र मोदी आणि भाजपाचे राष्ट्रीय अध्यक्ष अमित शाह यांना आचारंसहितेचे उल्लंघन केल्याच्या प्रकरणात क्लीन चिट देण्यास विरोध दर्शवला होता. या समितीमध्ये मुख्य निवडणूक आयुक्त सुनील अरोरा, निवडणूक आयुक्त अशोक लवासा आणि सुशील चंद्रा यांचा समावेश होता. लवासा हे अरोरा आणि चंद्रा यांच्या मताशी असहमत होते. लवासा यांनी ४ मे रोजी पाठवलेल्या पत्रात म्हटले आहे की, नरेंद्र मोदींना क्लीन चीट देण्यासंदर्भातील निर्णयात माझ्या मताचा उल्लेख करण्यात आला नाही.  क्लीन चिट देण्याबाबतच्या निर्णयात बहुमत महत्त्वाचे असले तरी अल्पमताचाही आदेशात उल्लेख केलाच पाहिजे, अशी त्यांची मागणी आहे.  ही व्यवस्था निर्माण होत नाही तोवर बैठकीत सहभागी होणार नाही, असा पवित्राही लवासा यांनी घेतला.

एखाद्या प्रकरणात आयोगातील तीन आयुक्तांपैकी जर एका आयुक्ताचे मत हे अन्य दोन सदस्यांपेक्षा वेगळे असेल तर आदेशामध्ये तशी नोंद झालीच पाहिजे. लवासा यांनी यासाठी सुप्रीम कोर्टाचा दाखला दिला आहे. सुप्रीम कोर्टाच्या निर्णयात ज्या पद्धतीने प्रत्येक न्यायाधीशाच्या मताचा उल्लेख केला जातो, तशीच पद्धत निवडणूक आयोगानेही अवलंबली पाहिजे, असे त्यांनी म्हटले होते.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More