कोल्हापूर (प्रतिनिधी) : सहकार चळवळीला दिशा देण्‍याचे काम गोकुळने केले आहे, असे प्रतिपादन पुण्यातील वैकुंठ मेहता इन्स्टिट्यूटचे सेवानिवृत्त डिन अनिल कारंजकर यांनी केले. ६९ व्‍या अखिल भारतीय सहकार सप्‍ताहनिमित्‍त गोकुळतर्फे आयोजित व्याखानामध्‍ये ते बोलत होते.
कारंजकर म्‍हणाले, की गोकुळने सहकाराच्या माध्यमातून दुग्ध व्यवसायात केलेली नेत्रदीपक प्रगती कौतुकास्पद असून, गोकुळने महिला, युवकांना दुग्ध व्यावसायाच्या माध्यमातून व्यवसायाची संधी उपलब्ध करून दिलेली आहे.
गोकुळ दूध संघातर्फे ताराबाई पार्क कार्यालयाच्‍या आवारात सहकार सप्‍ताहनिमित्‍त व्याखान आयोजित करण्यात आले होते. दीपप्रज्‍वलन व इंदिरा गाधी यांच्या जयंतीनिमित्त त्यांच्या प्रतिमेचे पूजन गोकुळचे चेअरमन विश्वास पाटील व संघाचे संचालक मंडळ यांच्या हस्‍ते करण्यात आले. सहकार बोर्डाचे एस. पी. जाधव यांनी सहकार गीत सादर केले.
प्रास्‍ताविक संघाचे चेअरमन विश्वास पाटील यांनी केले. संचालक शशिकांत पाटील यांनी आभार मानले. कार्बन क्रेडिट बायोगॅस योजनेची माहिती सिस्‍टीमा बायोगॅस पुणे या कंपनीचे प्रतिनिधी खुरर्म मुजावर यांनी दिली. सूत्रसंचालन एम. पी. पाटील यांनी केले.
यावेळी माजी चेअरमन व ज्येष्‍ठ संचालक अरूण डोंगळे, संचालक शशिकांत पाटील-चुयेकर, नंदकुमार ढेंगे, प्रकाश पाटील, चेतन नरके, बयाजी शेळके, अनिकेत शिंदे, संकलन व्‍यवस्‍थापक एस. व्‍ही. तुरंबेकर, महिला नेतृत्‍व विकास अधिकारी नीता कामत, अधिकारी, कर्मचारी आदी उपस्थित होते.
