मुंबई (प्रतिनिधी) : अभिनेत्री सायली संजीव मराठी सिनेसृष्टीतील कायम चर्चेत असणारे नाव. सायली ‘गोष्ट एका पैठणीची’ या सिनेमामुळे चर्चेचा विषय असते. या चित्रपटाला राष्ट्रीय पुरस्कारात उत्कृष्ट मराठी सिनेमा म्हणून पुरस्कार देण्यात आला. अशातच तिच्या ‘गोष्ट एका पैठणीची’ चित्रपटाचा ट्रेलर प्रदर्शित झाला आहे. त्यामुळे सायली पुन्हा एकदा चर्चेचा विषय ठरत आहे. ‘गोष्ट एका पैठणीची’ मधून सामान्य स्वप्नांचा असामान्य प्रवास प्रेक्षकांच्या भेटीला येणार आहे.
ही गोष्ट आहे एका स्वप्नाची, ही गोष्ट आहे एका पैठणीची. एक पैठणी असावी, इतके साधे स्वप्न बाळगणारी इंद्रायणी, तिच्या स्वप्नांबाबत खूप सकारात्मक दिसत आहे. मात्र या स्वप्नापर्यंत पोहोचण्याचा तिचा प्रवास खडतर दिसतोय. तिचे पैठणीचे हे स्वप्न पूर्ण होईल का, की तिचा हा प्रवास तिला एका वेगळ्या वाटेवर नेणार? या प्रश्नांची उत्तरे ‘गोष्ट एका पैठणीची’ पाहिल्यावरच मिळतील.
प्रत्येकाच्या आयुष्यात काही स्वप्ने असतात, कोणाची सत्यात उतरतात, कोणाची नाही. त्या स्वप्नांचा पाठपुरावा प्रत्येक जण आपापल्या परीने करतच असतो. आपली स्वप्नपूर्ती करतानाच्या या प्रवासात अनेक अनुभव येतात, काही चांगले असतात, काही कटू आठवणी देणारे. काही अनुभवातून आपला आयुष्याकडे पाहाण्याचा दृष्टिकोनच बदलून जातो. असाच एक रंजक प्रवास आपल्याला लवकरच अनुभवायला मिळणार आहे.
