मुंबई (प्रतिनिधी) : अभिनेत्री काजोलच्या ‘सलाम वेंकी’ या चित्रपटाचा ट्रेलर नुकताच प्रेक्षकांच्या भेटीस आला आहे. बालदिनाच्या निमित्ताने हा ट्रेलर प्रदर्शित करण्यात आला आहे. काजोलसोबतच विशाल जेठवा, राजीव खंडेलवाल, प्रकाश राज आणि अहना कुमरा यांनी या चित्रपटात प्रमुख भूमिका साकारली आहे.
या चित्रपटाचे दिग्दर्शन अभिनेत्री रेवती यांनी केले आहे. ‘सलाम वेंकी’ च्या ट्रेलरमधील संवादाने अनेकांचे लक्ष वेधले आहे. ‘सलाम वेंकी’ चित्रपटाच्या ट्रेलरमध्ये आई आणि मुलाच्या जोडीची बाँडिंग दिसत आहे. ही आई आणि मुलाची जोडी ट्रेलरमध्ये अभिनेते राजेश खन्ना यांचा ‘जिंदगी लम्बी नहीं बड़ी होनी चाहिए बाबू मोशाय’ हा डायलॉग म्हणताना दिसत आहे.
ट्रेलरमध्ये दिसत आहे की सुजाता ही तिच्या मुलाची म्हणजेच व्यंकटेशची काळजी घेत असते. व्यंकटेश हा एका आजाराचा सामना करत असतो, असे ट्रेलरमध्ये दिसत आहे. सुजाता ही भूमिका काजोलने साकारली आहे, तर व्यंकटेश ही भूमिका अभिनेता विशाल जेठवाने साकारली आहे. या चित्रपटामध्ये आमिर खानने देखील महत्त्वाची भूमिका साकारली आहे. ‘सलमा वेंकी’ हा चित्रपट ९ डिसेंबर रोजी प्रदर्शित होणार आहे.