Breaking News

 

 

‘उमेदवारीसाठी केजरीवालना माझ्या वडिलांनी ६ कोटी दिले…’

नवी दिल्ली (वृत्तसंस्था) : पश्चिम दिल्लीचे आम आदमी पार्टीचे उमेदवार बलबीर सिंह जाखड यांचा मुलगा उदय जाखडने पक्षावर गंभीर आरोप केले आहेत. लोकसभा निवडणुकीच्या तिकिटासाठी वडिलांनी आपचे अध्यक्ष आणि दिल्लीचे मुख्यमंत्री अरविंद केजरीवाल यांना ६ कोटी रुपये दिले. मी शिक्षणासाठी पैसे मागितले, मात्र त्यांनी ते न देता तिकीट मिळविण्यासाठी केजरीवाल यांना दिले, असे उदय जाखडने म्हटले आहे. उदयने पत्रकार परिषद घेऊन हा गंभीर आरोप केला आहे. दिल्लीतील मतदानाला २४  तास उरलेले असताना हा दावा करण्यात आल्याने राजकीय वर्तुळात मोठी खळबळ उडाली आहे. उदयच्या या दाव्यानंतर भाजपने आपची निवडणूक आयोगाकडे तक्रारही केली आहे.

माझ्या वडिलांनी पश्चिम दिल्लीतून खासदारकीचे तिकीट मिळवण्यासाठी अरविंद केजरीवाल यांना ६ कोटी रुपये दिले. काही दिवसांपूर्वी मी वडिलांना शिक्षणासाठी पैसे मागितले होते, पण त्यांनी नकार दिला. हा पैसा निवडणुकीत कामी येईल, असा विचार वडिलांनी केला होता. या तिकिटासाठी वडिलांकडून पैसे घेण्यात आले याचे पक्के पुरावे माझ्याकडे आहेत, असा दावा उदयने केला आहे.

निवडणूक लढण्यासाठी आपण ६ कोटी रुपये दिले आहेत, असे वडिलांनी काही दिवसांपूर्वीच सांगितले होते. वडिलांनी काँग्रेसचा माजी नेता आणि १९८४ च्या शिख दंगलीचा आरोपी सज्जन कुमारला जामीन मिळवून देण्यासाठीही प्रयत्न केल्याचे उदयने म्हटले आहे. सज्जन कुमार यासाठी मोठी रक्कम द्यायला तयार होता, असे त्याने सांगितले. दरम्यान, बलबीर जाखड यांनी हे सर्व आरोप फेटाळले आहेत. मुलाशी गेल्या पाच ते सहा वर्षांपासून संबंध नसल्याचे ते म्हणाले. हा पहिल्या पत्नीचा मुलगा आहे. उदयचे आरोप राजकीय आहेत, असे स्पष्टीकरण त्यांनी दिले आहे. तुर्तास आपच्या वतीने या आरोपांबद्दल कोणतेही स्पष्टीकरण देण्यात आलेले नाही.

306 total views, 6 views today

Leave a Reply

Your email address will not be published. Required fields are marked *

News Flash

अर्थ - उद्योग

आरोग्य

 

क्रीडा

गुन्हे