मुंबई (प्रतिनिधी) : जगातील सर्वांत श्रीमंत व्यक्ती असलेल्या एलॉन मस्क यांनी ट्विटर ही मायक्रो ब्लॉगिंग साईट विकत घेतली आहेत. कंपनी ताब्यात येताच ट्विटरचे नवीन मालक एलन मस्क यांनी बदल करण्याचा धडाका सुरू केला आहे.
कंपनीचे प्रमुखपद हातात येताच त्यांनी सर्वांत अगोदर ट्विटरच्या कार्यकारिणीमध्ये मोठे बदल केले आहेत. सीईओ पराग अग्रवाल यांच्यासह अनेक उच्चपदस्थ अधिकाऱ्यांना त्यांनी पदावरून काढून टाकले आहे. त्यानंतर त्यांनी आपल्या इतर कर्मचाऱ्यांना डेडलाइन्ससह नवनवीन कामे असाइन करण्यास सुरुवात केली. मस्क यांनी आणखी एक मोठा बदल करण्याचा निर्णय घेतला आहे.
या माहितीनुसार कंपनीमध्ये कर्मचारी कपात केली जाणार आहे. ट्विटरच्या जगभरातील सुमारे सात हजार ५०० हून अधिक कर्मचाऱ्यांना एलॉन मस्क बाहेरचा रस्ता दाखवू शकतात. एलॉन मस्क यांनी गेल्या आठवड्यात ४४ अब्ज डॉलर्सचा करार पूर्ण केला. ही पर्चेसिंग डील पूर्ण झाल्यानंतर, मस्क यांनी गेल्या आठवड्यात ट्विटरचा कारभार हातात घेतला. तेव्हापासून सध्याच्या कर्मचाऱ्यांना ते कामावरून काढून टाकतील, अशी अटकळ होती.
जगातील सर्वात श्रीमंत असलेल्या एलन मस्क यांनी ट्विटरसोबतच्या करारनंतर त्याची किंमत कमी करण्यासाठी प्रयत्न सुरू केले आहेत. ट्विटरमधील कर्मचाऱ्यांना कामावरून काढून टाकण्यास आजपासून सुरुवात केली आहे. मस्क यांना कंपनीच्या पायाभूत सुविधांचा खर्च कमी करून सुमारे १ अब्ज ८२ अब्ज डॉलरची बचत करायची आहे. ट्विटरच्या कर्मचार्‍यांना दिवस उजाडताच ई-मेल आले आहेत. कामावरून कमी केले जात असल्याची माहिती या मेलद्वारे त्यांना देण्यात आली आहे. मस्क यांनी कर्मचाऱ्यांना केलेल्या मेलनुसार, कंपनीमध्ये सुधारणा करण्यासाठी पावलं उचलली जात आहेत. त्यानुसार कर्मचाऱ्यांसाठी कंपनीतील प्रवेश बंद करण्यात येत असून, बॅज अॅक्सेसही सस्पेंड करण्यात आला आहे.
