हातकणंगले (प्रतिनिधी) : तालुक्यातील अतिग्रे येथील ग्रामपंचायतचे माजी सदस्य बाजीराव लोहार यांची मुलगी समीक्षा लोहार हिची ऑस्ट्रेलियातील सिडनी विद्यापीठात मास्टर ऑफ सायन्सच्या उच्च शिक्षणासाठी निवड झाली आहे. तिने बॅचलर ऑफ इंजिनिअरिंगची डिग्री मिळवली आहे. केंद्र सरकारची यासाठी तिला ८५ लाख रुपयांची शिष्यवृत्ती मिळाली आहे. यासाठी खासदार धनंजय महाडिक यांनी विशेष प्रयत्न केले.

देशभक्त रत्नाप्पा कुंभार सहकारी सूतगिरणीचे संस्थापक चेरअमन दलित मित्र अशोकराव माने यांनी घरी भेट देऊन समीक्षाचा सत्कार करून शुभेच्छा दिल्या. शिवाय आणखीन सर्व प्रकारची मदत करण्याचे अभिवचन दिले. शिवाजी विद्यापीठाचे कुलगुररू डॉ. डी. टी. शिर्के यांच्या हस्ते व खासदार धनंजय महाडिक, माजी खासदार निवेदिता माने यांच्या प्रमुख उपस्थितीत आपण स्वतः पुढाकार घेऊन अतिग्रे गावी सत्कार घेणार असल्याचे अशोकराव माने यांनी सांगितले. लोहार-सुतार समाजातून निवड झालेली समीक्षा लोहार ही देशातीलपहिली मुलगी आहे.

या कार्यक्रमप्रसंगी गावातील काँग्रेस पक्षाचे ज्येष्ठ कार्यकर्ते महादेव पाटील, भास्कर पाटील, माजी प्राचार्य व्ही. एम. पाटील, माजी सरपंच विद्याताई सूर्वशी, के.एम. चौगुले, सहकार उपनिबंधक वसंतराव सूर्यवंशी, हातकणंगले तालुका भाजपा शेतकरी मोर्चा आघाडी प्रमुख शिवाजी पाटील, युवक कार्यकर्ते शहाजी दबडे, परेश गवाणे, विठ्ठल गुरव आदी कार्यकर्ते उपस्थित होते.