Breaking News

 

 

राज्यात चौथ्या टप्प्यात ५७ टक्के मतदान

मुंबई (प्रतिनिधी) : राज्यासह देशभरात ७१ जागांसाठी आज (सोमवार) लोकसभा निवडणुकीच्या चौथ्या आणि अंतिम टप्प्यासाठीचे मतदान पार पडले. आज मुंबई व ठाण्यासह एकूण १७ लोकसभा मतदारसंघांमधील उमेदवारांचे भवितव्य मतपेटीत बंद झाले. राज्यात सरासरी ५७  टक्क्यांच्या आसपास मतदान झाले. मुंबईत तब्बल ६० टक्क्यांच्या आसपास मतदान झाल्याचा अंदाज आहे. विशेष म्हणजे गडचिरोलीमध्ये राज्यात सर्वाधिक ७२ टक्के, तर कल्याणमध्ये सर्वांत कमी ४४ टक्के मतदान झाले. ग्रामीण आणि आदिवासी पट्टा म्हणून ओळखल्या जाणाऱ्या नंदूरबारमध्ये ६७, दिंडोरीमध्ये ६३.५ आणि पालघरमध्ये ६१.३६ टक्के मतदान झाले. महाराष्ट्रातील सर्व ४८ जागांसाठीची निवडणूक प्रक्रिया पूर्ण झाली असून चार टप्प्यात झालेल्या मतदानाची सरासरी ६१ टक्के असल्याचे निवडणूक आयोगाने स्पष्ट केले.

शिवसेनेच्यादृष्टीने मुंबईचा गड अत्यंत महत्त्वाचा असल्याने येथील सहा मतदारसंघात काय घडणार, याबद्दल अनेकांना उत्सुकता आहे. मुंबईतील सहा मतदारसंघांमध्ये मतदानाची टक्केवारी वाढली आहे. यापैकी काँग्रेसच्या उर्मिला मातोंडकर यांच्या उमेदवारीमुळे सर्वाधिक चर्चेत असलेल्या उत्तर मुंबईत सर्वाधिक मतदान झाले. मतदानाच्या एकूण आकडेवारीवर नजर टाकल्यास चौथ्या टप्प्यातील मतदारसंघातील मतदानाची टक्केवारी २०१४च्या तुलनेत वाढली आहे. त्यामुळे हा वाढलेला टक्का कोणाला धक्का देणार, याविषयी राजकीय वर्तुळाकडून आडाखे बांधायला सुरुवात झाली आहे. 

यानंतर देशभरात मतदानाचे आणखी तीन टप्पे शिल्लक आहेत. यामध्ये सर्वाधिक लक्ष हे उत्तर प्रदेशकडे असेल. केंद्रात सत्तास्थापनेच्यादृष्टीने उत्तर प्रदेशची भूमिका नेहमीच महत्त्वाची राहिली आहे. त्यामुळे उर्वरित टप्प्यांमध्ये उत्तर प्रदेशातील महत्त्वपूर्ण मतदारसंघात कशाप्रकारे मतदान होणार, यावर बरीच राजकीय गणिते अवलंबून असतील.

408 total views, 3 views today

Leave a Reply

Your email address will not be published. Required fields are marked *

अर्थ - उद्योग

आरोग्य

 

क्रीडा

गुन्हे