मुंबई (प्रतिनिधी) : काँग्रेसच्या प्रमुख नेत्यांनी आज शिवसेना पक्ष प्रमुख उद्धवसाहेब ठाकरे यांची भेट घेऊन अंधेरी पोट निवडणुकीत शिवसेनेच्या उमेदवार ऋतुजा रमेश लटके यांना काँग्रेसचा पूर्ण पाठिंबा असल्याचे जाहीर केले. यावेळी काँग्रेस प्रदेश अध्यक्ष नाना पाटोले, मुंबई प्रदेश अध्यक्ष भाई जगताप, अमित विलासराव देशमुख, प्रवक्ते राजू वाघमारे, शिवसेना सचिव विनायक राऊत, विधिमंडळ गटनेते अजय चौधरी, अॅड. अनिल परब हे देखील उपस्थित होते.
सोनिया गांधी यांनी भाजपला गप्प करण्यासाठी हे पाऊल उचल आहे. ही जागा काँग्रेसची आहे; पण सेनेला सहकार्य करू, असा निर्णय आम्ही घेतला आहे. काँग्रेस पूर्ण ताकदीने प्रचार करणार आणि सेनेला मदत करून निवडणुकीत उभ्या असलेल्या उमेदवाराला ५० ते ६० हजार मतांनी विजयी करू, असा निर्धार पटोलेंनी व्यक्त केला.
पटोले म्हणाले की, महाविकास आघाडीमध्ये ज्या निवडणुका लागतील आणि ज्या पक्षाचा उमेदवार उभा राहिले त्याला आम्ही पाठिंबा देऊ, असे आमचे ठरले होते. त्याप्रमाणे आम्ही या अंधेरी पूर्व पोटनिवडणुकीला शिवसेनेला पाठिंबा देत आहे. सोनिया गांधी यांच्याशी देखील आम्ही चर्चा केली असून, यावरूनच आम्ही हा निर्णय घेतला आहे. काँग्रेस पक्ष या निवडणुकीमध्ये उद्धव ठाकरे यांच्या सोबत असणार आहेत, असे पटोले यांनी स्पष्ट केले आहे.
