हातकणंगले (प्रतिनिधी) : तालुक्यातील मजले येथे बळजबरीने वाटसरू महिलेच्या गळ्यातील सोन्याचे गंठन चोरणाऱ्या दोघांना हातकणंगले पोलिसांनी अटक केली आहे.
विजय प्रभाकर पोवार (वय ३८, रा. रुकडी) याला हातकणंगले येथील भंडारे पेट्रोल पंपाजवळ पकडले. दुसरा संशयित आरोपी विशाल सोनबा खाडे (वय २८, रा. हणमंतवाडी, ता. करवीर) याला त्याच्या घरातून ताब्यात घेण्यात आले.
गंठन लंपास करण्याची घटना मजले गावच्या हद्दीत घडली. संशयित आरोपींनी गुन्ह्यात काळ्या रंगाच्या हिरो होंडा स्प्लेंडर गाडीचा (एम.एच. ०९ सी बी १९९९) वापर केला होता. ग्रामस्थांनी दाखवलेले धाडस व पोलिसांची कार्यतत्परता यामुळे आरोपींना अर्ध्या तासाच्या आत ताब्यात घेण्यात आले. हातकणंगले पोलीस ठाण्याचे पोलीस निरीक्षक के. एन. पाटील यांनी गस्त घालणाऱ्या पो. कॉ. पटेकर, खेडकर, गायकवाड, खराडे, निकम यांना सूचना देऊन गंठन चोरट्यांना पकडण्याचे आदेश दिले होते. या कामी वाहतूक शाखेचे अंमलदार व डीबी पथकाचे विशेष सहकार्य लाभले.
