कोल्‍हापूर (प्रतिनिधी) : कोल्हापूर जिल्हा सह. दूध उत्पादक संघ, (गोकुळ) यांच्या वतीने  दि. ७ ऑक्टोबर रोजी सकाळी ११ वाजता गोकुळच्या ताराबाई पार्क येथील कार्यालयाच्या आवारात झिम्मा-फुगडी स्पर्धा आयोजित केल्या आहेत. ही स्पर्धेसाठी सव्वा लाख रुपये बक्षीस असून, स्पर्धेमध्ये झिम्मा, फुगडी, घागर घुमवणे, छुईफुई महिलांच्या पारंपरिक खेळांचा समावेश आहे, अशी माहिती संघाचे चेअरमन विश्वास पाटील यांनी दिली.

महिलांचे बचत गट तयार करून महिलांच्या कलागुणांना वाव देण्यासाठी गोकुळने नेहमीच प्रयत्नशील आहे. मराठमोळ्या संस्कृतीची परंपरा जोपासताना महिलांच्या पारंपरिक खेळांना संधी प्राप्त करून देण्यासाठी गोकुळ प्रत्येक वर्षी या स्पर्धेचे आयोजन करत आहे. स्पर्धेचे उद्घाटन व बक्षीस वितरण आ. हसन मुश्रीफ, आ. सतेज डी. पाटील, आघाडीचे प्रमुख नेते व संचालक मंडळ यांच्या हस्ते होणार आहे.

स्पर्धेचे नियम व अटी स्पर्धेच्या ठिकाणी पंचामार्फत सांगण्यात येतील. स्पर्धा कोल्हापूर जिल्ह्यातील गोकुळशी संलग्न दूध संस्थाच्या दूध उत्पादक महिलांकरिता आयोजित केलेल्या असून, गोकुळमार्फत विजेत्या संघांना रोख रकमेसह स्मृतिचिन्ह देऊन गौरविण्यात येणार आहे.