कोल्हापूर (प्रतिनिधी) : शिवाजी विद्यापीठाच्या एम.ए. मास कम्युनिकेशन विभागाच्या समन्वयक पदी पत्रकारिता व जनसंवाद अधिविभागातील सहायक प्राध्यापक डॉ. शिवाजी जाधव यांची नियुक्ती करण्यात आली. नुकतेच डॉ. जाधव यांना विद्यापीठ प्रशासनाकडून नियुक्तीचे पत्र देण्यात आले.
शिवाजी विद्यापीठाचे कुलगुरू प्रा. डॉ. डी. टी. शिर्के, प्र-कुलगुरू डॉ. पी. एस. पाटील तसेच प्र-कुलसचिव डॉ. विलास शिंदे यांनी त्यांच्याकडे ही जबाबदारी सोपवली. डॉ. जाधव यांना पत्रकारितेतील सोळा वर्षांचा अनुभव आहे. प्रशिक्षणार्थी बातमीदारापासून सहयोगी संपादक पदापर्यंत विविध टप्प्यावर त्यांनी पत्रकारितेत काम केलेले आहे. पत्रकारितेशी संबंधित त्यांची आठ पुस्तके प्रकाशित झालेली आहेत. अलीकडेच त्यांना पत्रकारिता व जनसंवाद विषयातील पीएचडी मार्गदर्शक म्हणून मान्यता मिळालेली आहे. पद्मश्री डॉ. ग. गो. जाधव पत्रकारिता अध्यासनाचेही ते समन्वयक आहेत.
