मुंबई (प्रतिनिधी) : वेदांता-फॉक्सकॉन प्रकल्प गुजरातला गेल्याच्या अपयशाचे खापर शिंदे-फडणवीस आमच्यावर फोडत आहेत; मात्र आम्ही हा प्रकल्प महाराष्ट्रात राहावा म्हणून खूप प्रयत्न केले, अशी प्रतिक्रिया माजी मुख्यमंत्री उद्धव ठाकरे यांनी दिली.
वेदांता-फॉक्सकॉन प्रकल्प गुजरातला गेल्याने राज्यातील राजकारण चांगलेच तापल्याचे पाहायला मिळत आहे. सत्ताधारी आणि विरोधक एकमेकांवर आरोप-प्रत्यारोप करताना पाहायला मिळत आहेत. यावर ठाकरेंनी पहिली प्रतिक्रिया दिली आहे.
वेदांता-फॉक्सकॉन प्रकल्प गुजरातला गेल्यानंतर सगळेच नेतेमंडळी आपली प्रतिक्रिया देत होते; मात्र उद्धव ठाकरे यांनी याप्रकरणी कोणतीही प्रतिक्रिया दिलेली नव्हती. अखेर त्यांनी आपली पहिली प्रतिक्रिया दिली आहे. फॉक्सकॉन आणण्यासाठी आपल्या सरकारने खूप प्रयत्न केले; पण तो आता गुजरातला गेल्याने आत्ताचे सरकार आपल्या अपयशाचे खापर जाणीवपूर्वक मविआवर फोडत असल्याचे ठाकरे म्हणाले.
‘शिवसेना फोडण्याचा काहीजण प्रयत्न करत आहेत, पण आधी त्यांनी शिवसेनेचा इतिहास जाणून घ्यावा, शिवसेनेंच्या पिढ्याचा अभ्यास करावा, आमची सहावी पिढी आता मैदानात उतरली आहे. माझ्यासमोर बसलेला शिवसैनिक हा धगधगत्या मशालीप्रमाणे मैदानात उतरला आहे.’ अशी टीका उद्धव ठाकरेंनी शिंदे गटावर केली आहे.
