मुंबई (प्रतिनिधी) : शिवसेना खासदार संजय राऊत यांच्या न्यायालयीन कोठडीत १४ दिवसांची वाढ करण्यात आली आहे. १९ सप्टेंबरपर्यंत संजय राऊतांना न्यायालयीन कोठडीत ठेवण्याचे निर्देश मुंबई सत्र न्यायालयाने दिले आहेत.
न्यायालयीन कोठडीत वाढ केल्याने संजय राऊत यांचा तुरुंगातील मुक्कामात आणखीन वाढ झाली आहे. पत्राचाळ घोटाळा प्रकरणी संजय राऊत यांना ईडीकडून अटक करण्यात आली आहे. ईडीने पत्राचाळ गैरव्यवहार प्रकरणात राऊत यांच्या पत्नीची चौकशी केली. राऊत यांचे निकटवर्तीय प्रवीण राऊत यांनासुद्धा अटक करण्यात आली होती. प्रवीण राऊत यांनी या व्यवहारात मिळालेली काही रक्कम संजय राऊत यांच्या पत्नीच्या बॅंक खात्यात वर्ग केली आहे. त्यातून राऊत यांनी अलिबागमध्ये जमीन खरेदी केल्याचा आरोप ईडीने केला आहे.
गोरेगाव येथील पत्राचाळीच्या पुनर्वसनासाठी प्रवीण राऊत यांची गुरू आशीष कन्स्ट्रक्शन कंपनी पुढे आली होती. राकेश वाधवान, सारंग वाधवान आणि प्रवीण राऊत यांचे या कामासाठी म्हाडासोबत कंत्राट झाले होते. म्हाडा भाडेकरूंना घरे न बांधताच प्रवीण राऊत यांच्या कंपनीने ९ विकास कामांना ९०१ कोटींना एफएसआय विकला आणि मेडोज नावाचा प्रोजेक्ट सुरू केला. त्याच्या नावाखाली या कंपनीने १३८ कोटी रुपये जमा केले होते.
म्हाडाच्या इंजिनिअरने तक्रार केल्यानंतर या कंपनीची ईडीकडून चौकशी करण्यात आली होती. या चौकशीत १०३९.७९ कोटी रुपयांचा गैरव्यवहार झाल्याचं चौकशीत उघड झाले. त्यामधील १०० कोटी रुपये प्रवीण राऊत यांच्या अकाऊंटवर जमा झाल्याचे समोर आले आहे. ही रक्कम प्रवीण राऊत यांनी जवळच्या नातेवाईकांच्या खात्यावर ट्रान्सफर केली होती. त्यातील ५५ लाख रूपये संजय राऊत यांच्या पत्नी वर्षा राऊत यांच्या खात्यावर जमा झाल्याचं उघड झालं आहे. त्यामुळे हे प्रकरण उघडकीस आले आहे आणि याची ईडीकडून चौकशी सुरू आहे.
