Breaking News

 

 

वाढदिनीही चर्चा ‘आपलं ठरलंंय’ची…

कोल्हापूर (प्रमोद मोरे) : जिल्ह्याच्या राजकारणात सध्या काँग्रेसचे आमदार सतेज पाटील यांच्या भूमिकेमुळे ‘आपलं ठरलंय’ हा शब्द भलताच लोकप्रिय झाला आहे. लोकसभा निवडणुकीच्या पार्श्वभूमीवर जिल्ह्यात या शब्दाला फारच वजन प्राप्त झालं आहे. आज आ. पाटील यांच्या वाढदिनीही सगळीकडेच ‘आपलं ठरलंय’ हा याच शब्दाचा विविध ठिकाणी, विविध पद्धतीने वापर करण्यात आला. त्यातच कोल्हापूर मतदारसंघातून शिवसेना-भाजपकडून निवडणूक लढवत असलेले प्रा. संजय मंडलिक आणि आमदार पाटील यांना कार्यकर्त्यांनी स्टेजवर उचलून ‘आपलं ठरलंय’ हे अप्रत्यक्षरीत्या दाखवून दिले आहे.

लोकसभा निवडणुकीमध्ये आ. पाटील यांची खासदार महाडिक यांच्याविरोधी भूमिका काही लपून राहिलेली नाही. काँग्रेस-राष्ट्रवादीच्या सर्वच नेत्यांनी आता या वादासमोर आपले हात टेकले आहेत. हे भांडण मिटवण्याक्षा जे आहे ते चालू देत, आपण आपला प्रचार केलेला बरा अशा पद्धतीने प्रत्येक नेता कामाला लागला आहे. आ. पाटील यांनी सुरुवातीपासूनच आपली भूमिका ठामपणे मांडून त्यावर मार्गक्रमण चालू ठेवले आहे. पडद्यामागे राहून खास कोल्हापुरी स्टाईलमध्ये ‘आपलं ठरलंय’ हा संदेश जिल्ह्यातील सर्व कार्यकर्ते आणि मतदारांना दिला आहे.

याचाच एक भाग म्हणून आज त्यांच्या वाढदिवसानिमित्त स्टेजच्या मागे, कमानीवर, बोर्डवर इतकंच काय, स्टिकर, टोप्यावर ‘आपलं ठरलंय’ या शब्दाचा वापर करण्यात आला आहे. हे कमी म्हणून की काय, आता या हेच शब्द वापरून चक्क गाणं तयार करण्यात आलंय. त्यामुळे त्यांच्या वाढदिवसानिमित्त संपूर्ण जिल्ह्यात पुन्हा एकदा ‘आपलं ठरलंय’चीच चर्चा जोरदारपणे संपूर्ण जिल्ह्यामध्ये रंगली आहे. काँग्रेसचे आमदार यांना सेनेच्या उमेदवाराने दिलेल्या शुभेच्छा आणि कार्यकर्त्यांनी त्यांना उचलून ‘आपलं ठरलंय’चा दिलेला नारा, भविष्यात जिल्ह्याच्या राजकारणात नवीन बदल घडविणारा ठरेल, यात काही शंका नाही.

6,105 total views, 6 views today

Leave a Reply

Your email address will not be published. Required fields are marked *

अर्थ - उद्योग

 

क्रीडा