कोल्हापूर (प्रतिनिधी) : महाराष्ट्र राज्य राजपत्रित अधिकारी महासंघाच्या कोल्हापूर विभागाच्या उपाध्यक्षपदी सातारा जि. प. ग्रामीण विकास यंत्रणेच्या प्रकल्प संचालक सुषमा देसाई यांची, तर महिला सहचिटणीसपदी कोल्हापूर जिल्हा माहिती कार्यालयाच्या माहिती अधिकारी वृषाली पाटील व सार्वजनिक बांधकाम विभागाच्या शाखा अभियंता पूनम पाटील यांची बिनविरोध निवड झाली आहे. सहचिटणीस म्हणून राज्यकर उपायुक्त चंद्रकांत मंचरे व उपविभागीय अधिकारी बाबासाहेब वाघमोडे यांची बिनविरोध निवड झाली आहे.
राजपत्रित अधिकारी महासंघाच्या गोरेगाव (मुंबई) येथे नुकत्याच झालेल्या अधिवेशनात त्यांची निवड झाल्याचे जाहीर करण्यात आले. महासंघाच्या राज्यस्तरीय कार्यकारिणीची सन २०२२ ते २०२५ अशी त्रैवार्षिक निवड यादी निवडणूक अधिकारी आर. जे. पाटील यांनी घोषित केली. नवनियुक्त पदाधिकाऱ्यांच्या निवडीबद्दल महासंघाचे संस्थापक तथा मुख्य सल्लागार ग. दि. कुलथे यांच्या हस्ते सत्कार करण्यात आला.
ग. दि. कुलथे म्हणाले, राजपत्रित अधिकाऱ्यांनी कार्यालयीन कामाला प्राधान्य देऊन उर्वरित वेळेत राजपत्रित अधिकाऱ्यांचे प्रश्न मार्गी लावण्यासाठी महासंघालाही वेळ द्यावा. महासंघाच्या कार्यकारिणीमध्ये तरुण पिढीतील सदस्यांची संख्या अधिक असून, यापुढेही महासंघाचे काम आणखी जोमाने होण्यासाठी सर्वांनी समन्वयाने काम करावे. ग. दि. कुलथे, अध्यक्ष विनोद देसाई, तत्कालीन सरचिटणीस विनायक लहाडे, कोषाध्यक्ष समीर भाटकर, नितीन काळे यांच्या मार्गदर्शनाखाली ही निवड प्रक्रिया राबविण्यात आली.
