Breaking News

 

 

इपिलेप्सी शिबिरात चारशेवर रुग्णांची तपासणी…

कोल्हापूर (प्रतिनिधी) :  डोक्यातील रक्त वाहिनीमध्ये बिघाड झाल्याने हात,पाय वाकडे होणे,शरीर ताट होणे,अचानकपणे स्तब्ध होणे ही लक्षणे आकडी,फेफरे या आजारात असतात. हा आजार मानसिक नसून तो मेंदूचा आजार असल्याने यासाठी मेंदूविकार तज्ञांकडून उपचार केले पाहिजेत, असे प्रतिपादन इपिलेप्सी फाउंडेशन मुंबईचे डॉ.निर्मल सुर्या यांनी केले. ते बावडा येथील लाईन बाजारमधील सेवा रुग्णालयात मोफत उपचार शिबिरामध्ये बोलत होते. जि.प.चे मुख्य कार्यकारी अधिकारी अमन मित्तल कार्यक्रमाच्या अध्यक्षस्थानी होते.  या इपिलेप्सी शिबिराचा चारशेहून अधिक रुग्णांची तपासणी करण्यात आली.

डॉ.निर्मल सूर्या म्हणाले, २०११ पासून यासाठी ही मोहीम महाराष्ट्रात सुरू आहे. महाराष्ट्रात आतापर्यंत २९ हजार रुग्णांवर उपचार केले आहेत. या आजाराचा शासनाने महात्मा फुले जीवन आरोग्य योजनामध्ये याचा समावेश केला आहे. आकडी, फेफरे हा आजार २ टक्के आनुवंशिक असून कुटुंबीयांनी घाबरून न जाता लगेच उपचार घेतले पाहिजेत, असे मत व्यक्त केले.

अमन मित्तल म्हणाले, जागतिक आरोग्य दिनानिमित्त हे शिबिर आयोजित केले आहे. आकडी,फेफरे व फिट येणे यावर रुग्णांना कुठे उपचार करायचे याची माहिती नसते म्हणून याचे मोफत आयोजन केले आहे. या शिबिरात तीन महिन्यांचे औषध देण्यात येणार आहे. नंतरच्या पुढील उपचारासाठी जिल्हा प्राथमिक आरोग्य केंद्रातून औषधे देण्यात येणार आहेत.

शिबीरामध्ये आकडी,फेफरे करिता इपिलेप्सी फाऊंडेशन मार्फत लहान मुले, व्यक्ती यांची सर्वांगीण तपासणी करुन त्यांचे मेंदूचे ई.ई.जी काढण्यात आले. त्यानंतर मोफत उपचार करून औषधे देण्यात आली.

यावेळी जिल्हा शल्यचिकित्सक डॉ.बी.सी.पाटील, प्राचार्य डॉ.सी.जे.शिंदे, जिल्हा आरोग्यधिकारी डॉ.योगेश साळे, अतिरिक्त जिल्हा शल्यचिकित्सक डॉ.व्ही.पी. देशमुख, निवासी वैद्यकीय अधिकारी (बाह्य संपर्क) डॉ.हर्षला वेदक,सेवा रुग्णालयाचे अधीक्षक डॉ.उमेश कदम यांच्यासहीत मान्यवर उपस्थित होते.

 

Leave a Reply

Your email address will not be published. Required fields are marked *

अर्थ - उद्योग