Breaking News

 

 

काँग्रेस हटली की गरिबी हटेल, ही जनतेला जाणीव : नरेंद्र मोदी

सोनपूर (वृत्तसंस्था) : देशातील गरिबी हटवण्यासाठी असलेल्या जालीम जडीबुटीचे नाव ‘काँग्रेस हटाओ’ असे आहे. काँग्रेसला देशातून हटवल्यावर गरिबी संपेल, हे देशातील सर्वसामान्यांना समजले आहे, अशा शब्दांत पंतप्रधान नरेंद्र मोदी यांनी काँग्रेसवर घणाघाती टीका केली. ते आज (शनिवार) ओडिशामधील सोनपूर येथे आयोजित प्रचारसभेत बोलत होते. मोदी यांनी यावेळी बिजू जनता दलावरही जोरदार टीका केली.  

पंतप्रधान मोदी म्हणाले की, जनतेने गरिबीतून कधीच बाहेर पडू नये अशी ओदिशातील बिजू जनता दल आणि काँग्रेस या पक्षांची धोरणे आहेत. त्यांना भ्रष्टाचार करण्यासाठी जनतेला गरिबीत ठेवायचे आहे. मात्र, तुम्हाला देशाच्या विकासासह राज्याचा विकास करायचा असेल तर तुम्हाला चांगली संधी मिळाली आहे. योग्य पक्षाला आणि उमेदवाराला मत देऊन तुम्हीही विकासाच्या प्रवाहात सहभागी होऊ शकता. ओदिशात नैसर्गिक साधनसंपत्ती विपुल आहे. तरीही इतर राज्यांचा तुलनेत राज्याचा विकास का झाला नाही, याचा विचार करा. तुम्ही जे सरकार निवडले ते तुमच्यासाठी काम करत नाही. त्यामुळे मजबूत सरकार निवडून द्या. गरीबीतून बाहेर पडण्यासाठी पारदर्शक आणि तुमच्यासाठी काम करणारे सरकार निवडा, असे आवाहनही त्यांनी केले.

यावेळी भाजप सरकारने पाच वर्षांत केलेल्या विकासकामांची माहितीही त्यांनी दिली. ओदिशातील अनेक घरांमध्ये आम्ही वीज पोहचवली आहे, असे त्यांनी सांगितले. गॅसजोडणी, मोफत धान्य योजना, शौचालयांची सुविधा आमच्या सरकारने जनतेला दिल्या आहेत. केंद्रात आणि राज्यात एकच सरकार असेल तर राज्याचा वेगाने विकास होईल, असा विश्वासही त्यांनी व्यक्त केला. आमच्या सरकारने भ्रष्टाचाराला लगाम घातल्याने महाआघाडीच्या नावाखाली ते एकत्र आले आहेत. पुन्हा भ्रष्टाचार करता यावा यासाठी मजबूर सरकार स्थापन करण्याचा त्यांचा प्रयत्न आहे. मात्र, मजबूर सरकार हवे की मजबूत सरकार हवे यावे निर्णय तुम्हीच घ्यायचा आहे असेही ते म्हणाले.

Leave a Reply

Your email address will not be published. Required fields are marked *