कोल्हापूर (प्रतिनिधी) : धनंजय महाडिक युवाशक्तीच्या वतीने आयोजित केलेल्या दहीहंडीनिमित्त कोल्हापुरातील हौशी छायाचित्रकार आणि वृत्तपत्रांसाठी काम करणार्‍या फोटोग्राफरसाठी अनोखी स्पर्धा आयोजित केली आहे. दहीहंडी सोहळ्यातील भव्यता, गोविंदा पथकांचे मानवी मनोरे, त्यातील थरार टिपणार्‍या सर्वोत्कृष्ट छायाचित्रांसाठी ही स्पर्धा होणार आहे.

शुक्रवार, दि. १९ ऑगस्ट रोजी दुपारी ४ वाजता ऐतिहासिक दसरा चौकात युवाशक्तीच्या दहीहंडीचा थरार रंगणार आहे. तब्बल ३ लाख रुपयांचे पारितोषिक विजेत्या संघासाठी ठेवण्यात आले आहे. मुंबईतील महिला गोविंदा पथक, युवाशक्ती दहीहंडीसाठी येणार असून, या पथकाच्या मानवी मनोर्‍याबद्दलही मोठी उत्कंठा असणार आहे.

दरम्यान, सलामीला ५ मानवी थर रचणार्‍या गोविंदा पथकाला ५ हजार रुपये, तर ६ मानवी थर रचणार्‍या गोविंदा पथकाला १० हजार रुपये दिले जाणार आहेत. हौशी छायाचित्रकारांसाठी एक गट असेल, तर प्रेस फोटोग्राफरसाठी दुसरा गट असेल. प्रत्येक गटातील विजेत्याला रोख ५ हजार रुपयांचे प्रथम, ३ हजार रुपयांचे द्वितीय आणि २ हजार रुपयांचे तृतीय पारितोषिक दिले जाईल. मोबाईल अथवा फोटो कॅमेर्‍यातून काढलेला फोटो स्पर्धेसाठी ग्राह्य धरला जाणार आहे. हे फोटो yuvashaktidahihandiphoto@gmail.com  या मेल आयडीवर २५ ऑगस्टपूर्वी पाठवायचे आहेत. छायाचित्रण क्षेत्रातील अनुभवी आणि तज्ञ मान्यवरांकडून या स्पर्धेचे परीक्षण केले जाईल.