कोल्हापूर (प्रतिनिधी) : सभासदांसाठी विविध कल्याणकारी योजना राबविणारी व आर्थिकदृष्ट्या पाठबळ देणारी कोजिमाशि पतसंस्था राज्यातील शिक्षण क्षेत्रासाठी आदर्शवत आहे. संस्थेच्या सभासद हिताच्या कारभारामुळे स्वाभिमानी सत्ताधारी आघाडीच्या पाठीशी जिल्ह्यातील संपूर्ण सभासद निश्चितच राहतील व मताधिक्यांनी विजयी करतील, असा विश्वास सदाशिवराव मंडलिक महाविद्यालयाचे प्राचार्य अर्जुन कुंभार यांनी व्यक्त केला.
मुरगूड येथे झालेल्या कागल तालुका प्रचार मेळाव्यात ते अध्यक्षस्थानावरून बोलत होते. प्राचार्य अर्जुन कुंभार म्हणाले, लाभांश वाटप, दीपावली भेट, अपघात विमा, महिला सखी मंच, कोविड काळात सभासदाना केलेली मदत या योजनांमुळे कोजिमाशि ही केवळ संस्था नसून शिक्षक वर्गाचे समृद्ध कुटुंबच आहे.
स्वाभिमानी आघाडी प्रमुख दादा लाड म्हणाले, कोजिमाशि ही शिक्षकांची मातृसंस्था आहे. या संस्थेत सभासद हिताच्या योजना राबवून संपूर्ण राज्यात संस्थेचा नावलौकिक झाला आहे. विरोधकांनी कोजिमाशिच्या कारभारावर बोलावे, खोटे नाटे कोणतेही आरोप करू नयेत. संस्थेने सभासदांच्या सुखदुःखात साथ देताना त्यांची घरे उभारली. मुलांचे शिक्षणासाठी, आजारपणात संस्था उपयोगी पडली आहे. काटकसरीचा कारभार करूनच संस्था चालविलली आहे. त्यामुळे कोणतीही दिशाभूल करून विरोधकांच्या ताब्यात संस्था कदापिही जाणार नाही. यापुढे कर्जाचा व्याजदर एक अंकी केला जाणार आहे. मेडिक्लेम योजना ही सुरू करण्याचा मानस आहे.
विनाअनुदानित शाळा संघटनेचे नेते खंडेराव जगदाळे म्हणाले, सत्ताधारी स्वाभिमानी आघाडीकडे सभासदांची मोठी जनशक्ती आहे. विरोधी आघाडीकडे सुप्तपणे राजकीय शक्ती आहे. जनशक्ती असलेल्या सत्ताधारी आघाडीचाच विजय निश्चित आहे. विरोधक केवळ टीका करण्याचेच काम करीत आहेत. सभासदांनी गाफील न राहता आघाडीच्या प्रचारात कार्यरत राहावे.
मेळाव्याचा प्रारंभ चतुर्थ श्रेणी शिक्षकेतर कर्मचारी व महिला सभासदांच्या हस्ते करण्यात आला. निवडणुकीत उमेदवारी अर्ज माघार घेतलेल्या प्रमुख कार्यकर्त्यांचा सत्कार झाला. संचालिका सुलोचना कोळी यांचेही मनोगत झाले. जय शिवराय शिक्षण संस्थेचे कार्यवाह आण्णासाहेब थोरवत, माजी चेअरमन राजेंद्र रानमाळे, अविनाश चौगुले, एम. बी. टिपुगडे, बाळ डेळेकर यांच्यासह सभासद मोठ्या संख्येने उपस्थित होते.
