मतमोजणीची सर्वसामान्यांमध्ये उत्सुकता : जिल्ह्यातील दिग्गज उमेदवार निश्चिंत !

0 5

कोल्हापूर (सरदार करले) : लोकसभा निवडणुकीच्या निकालाला आता अवघे काही तास राहिले आहेत. प्रत्येकाच्या मनात प्रचंड उत्सुकता आहे. प्रत्येकाच्या हृदयाची धडधड वाढू लागली आहे. सर्वसामान्यांची ही गत तर या निवडणुकीत प्रत्यक्षात रिंगणात उतरलेल्या उमेदवारांची काय अवस्था असेल. आज मतमोजणीच्या आदल्या दिवशी त्यांची दैनंदिनी कशी राहिली, याबद्दल प्रत्येकालाच उत्सुकता असणे सहाजिक आहे.

निवडणूक म्हटले की, कोणीतरी जिंकणार आणि कोणीतरी हरणार. निवडणुकीच्या काळात केलेली प्रचंड धावपळ, खर्च लक्षात घेता मनाला रुखरुख लागणे स्वाभाविक आहे. निकालाच्या पार्श्वभूमीवर उमेदवारांचा आजचा दिवस कसा गेला, हे जाणून घेण्याचा ‘लाईव्ह मराठी’ने प्रयत्न केला.

कोल्हापूर लोकसभा मतदारसंघातील उमेदवार खा. धनंजय महाडिक यांनी आज (बुधवार) सकाळी श्री महालक्ष्मी आणि श्री गणेशाचे दर्शन घेतले. दिवसभर घर आणि कार्यालयात येणाऱ्यांशी त्यांनी चर्चा केली. त्यांच्या मनावर कोणता ताण नव्हता. सायंकाळी उद्याच्या मतमोजणीसाठी  केंद्रावर उमेदवारांचे प्रतिनिधी म्हणून जाणाऱ्या १२६ जणांना प्रशिक्षण देण्यात आले, तेथे त्यांनी उपस्थिती लावली.

महायुतीचे उमेदवार प्रा. संजय मंडलिक यांचाही दिवस सर्वसामान्यच राहिला. सकाळपासून दिवसभर घरी येणार्‍या लोकांच्या भेटीगाठी त्यांनी घेतल्या. मधला एक तास ते कुठेतरी बाहेर जाऊन आले. मात्र कुठे जाऊन आले, हे समजू शकले नाही. सायंकाळी १३४ मतमोजणी प्रतिनिधींना प्रशिक्षण देण्यात आले, त्या वेळी ते उपस्थित होते.

हातकणंगले लोकसभा मतदारसंघातील आघाडीचे उमेदवार व स्वाभिमानी शेतकरी संघटनेचे नेते खा. राजू शेट्टी यांनी नेहमीप्रमाणे भागात दौरा करणेच पसंत केले. सकाळी बाहेर पडून त्यांनी लोकांशी चर्चा केली. त्यांचा बराचसा वेळ गडहिंग्लज परिसरात गेला. ‘नो टेन्शन’ अशा शब्दात त्यांनी आपण तणावमुक्त असल्याचे सांगितले.

महायुतीचे उमेदवार धैर्यशील माने यांचाही दिवस सामान्य गेला.  दिवसभरात घरी आलेल्या लोकांच्या भेटीगाठी त्यांनी घेतल्या. मतदान केंद्रावर जाणाऱ्या प्रतिनिधींची त्यांनी आढावा बैठक घेतली. त्यांनीही ही निवडणूक सहज घेतली आहे. त्यामुळे त्यांच्या मनावरही ताण नव्हता.

एकूणच मतमोजणीच्या पूर्वसंध्येला सर्वसामान्यांमध्ये उत्सुकता आहे. मात्र उमेदवार निश्चिंत असल्याचे दिसून आले.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More