भाडळी खिंडीत मिरची व्यापाऱ्यांना लुटणारे तिघे २४ तासांत जेरबंद

0 2

कोल्हापूर (प्रतिनिधी) : कोल्हापूर-रत्नागिरी रस्त्यावरील भाडळी खिंडीत मिरची व्यापाऱ्यांकडून सुमारे चार लाख रुपये लंपास करणाऱ्या आरोपींचा २४ तासात छडा लावण्यात कोडोली पोलिसांना यश आले आहे. या प्रकरणी अरविंद आनंदा हेगडे (रुकडी, ता. हातकणंगले), आनंदा लक्ष्‍मण वासुदेव, अक्षय अशोक गिरी (दोघेही रा, विक्रमनगर, कोल्हापूर) या तिघांना अटक करण्यात आली आहे. या प्रकरणातील दोन आरोपी अजून फरार आहेत.

रुकडीतील काही व्यापारी मिरची घेऊन मलकापूर व रत्नागिरी येथील आठवडा बाजारात विक्रीसाठी जातात. मिरची विक्री करून परत जाताना त्यांच्याकडे मोठी रक्कम असते अशी माहिती या चोरट्यांना मिळाली. त्यांनी रविवारी रात्री दोन दुचाकीवरून येऊन भाडळी खिंडीत या व्यापाऱ्यांचे वाहन अडवून त्यांना चाकू, सत्तुराचा धाक दाखवून त्यांच्याकडील सुमारे चार लाख लंपास केले होते. या प्रकरणी राजू दादू शिंदे (रा. रुकडी) यांनी फिर्याद दिली होती त्यानुसार कोडोली पोलिसांनी या प्रकरणातील तिघांना अवघ्या २४ तासांत अटक केली.

या व्यापाऱ्यांविषयी टेम्पोचालक अरविंद हेगडे याने त्याचा मेहुणा आनंदा वासुदेव व अक्षय गिरी यांना माहिती दिली होती. त्यानंतर कट रचून या व्यापाऱ्यांना लुटले होते. यातील अक्षय गिरी व आनंद वासुदेव हे दोघे रेकॉर्डवरील गुन्हेगार आहेत. ही कारवाई पोलीस उपाधीक्षक आर. आर. पाटील, कोडोली पोलीस ठाण्याचे सहाय्यक पो. नि. संजीव झाडे. स. पो. नि. भालचंद्र देशमुख, पो. उपनिरीक्षक सचिन वसमळे, हिंदुराव केसरे, सचिन परीट, उदय काटकर, विजय सोनुले, सचिन वायदंडे, आनंदराव पाटील, हिम्मत कुंभार, दिलीप भारती, सुनील तिबिले आदींनी केली.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More