कोल्हापुरात १० मे पासून भगिनी महोत्सवास प्रारंभ

0 3

कोल्हापूर (प्रतिनिधी) : आ. राजेंद्र क्षीरसागर फौंडेशनच्यावतीने यंदा भगिनी महोत्सव दि. १० ते १२ मे या कालावधीत कोल्हापुरातील प्रायव्हेट हायस्कूलच्या पटांगणावर आयोजित करण्यात आल्याची माहिती सौ. वैशाली राजेश क्षीरसागर यांनी आज (शनिवार) पत्रकार परिषदेत दिली.

सौ. वैशाली क्षीरसागर म्हणाल्या की, सदरच्या महोत्सवात २५० महिला बचत गटांना मोफत विक्री स्टॉल उपलब्ध करून देण्यात येणार आहेत. महापौर सौ. सरिता मोरे यांच्या हस्ते
शुक्रवार दि.१० रोजी सकाळी ११.०० वाजता महोत्सवाचे उद्धाटन होणार आहे. यावेळी लहान मुलांच्या फॅन्सी ड्रेस स्पर्धा, लावणी सम्राज्ञी मेघा घाडगे आणि अभिनेत्री श्रुती मराठे यांची जुगलबंदी रंगणार आहे. तसेच मेघा घाडगे ग्रुपच्या अनेक लावण्यवतींच्या लावण्याचा कार्यक्रम होणार आहे. 

शनिवार दि.११ रोजी सकाळी १०.०० ते २.०० या वेळेत टीव्ही कलाकारांच्या “भगिनी कोल्हापूरची” स्पर्धाचा खेळ,  ‘मिस भगिनी आणि मिसेस भगिनी २०१९’ या महिला आणि युवतींच्या सौंदर्य स्पर्धेचे सायं ५.०० ते ७.०० या वेळेत आयोजन करण्यात आले आहे. यानंतर कॉमेडी किंग कुशल बद्रिके आणि अभिनेत्री श्रेया बुगडे यांची कॉमेडीची जुगलबंदी पहावयास मिळणार आहे. तसेच अभिनेत्री व नृत्यांगना तेजा देवकर, दीपाली सय्यद, रेशम टिपणीस, भार्गवी चिरमुले, पुष्कर जोग, गायक रोहित राऊत, गायिका मधुर कुंभार या सिने कलाकारांना पाहण्याची संधी मिळणार आहे. रविवार दि.१२ रोजी सकाळी १०.०० ते दुपारी २.०० या वेळेत महिलांच्या पारंपारिक स्पर्धांचे आयोजन करण्यात आले आहे.

महोत्सवाच्या सांगता समारंभात  ‘भगिनी पुरस्कार २०१९’ दिला जाणार आहे. तसेच आंतरराष्ट्रीय ख्याती मिळविलेल्या सिने, क्रीडा, सामाजिक आणि चळवळीतील महिलांना या पुरस्काराने सन्मानित करण्यात येणार आहे. यानंतर सायंकाळी ७.०० वाजता महाराष्ट्राच्या लोककला आणि संस्कृती वर आधारित “महाराष्ट्र दर्शन” या कार्यक्रमाने महोत्सवाची सांगता होणार आहे, असेही त्यांनी सांगितले.

या वेळी मंगलताई साळोखे, पूजा भोर, पूजा कामते, मंगल कुलकर्णी, सोनाली पेडणेकर, गौरी माळदकर, गीता भंडारी, मीनाताई पोतदार उपस्थित होत्या.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More